काठमाडौं । प्रधानमन्त्री पुष्पकमल दाहाल ‘प्रचण्ड’ले उपयुक्त समयमा भारतीय प्रधानमन्त्री नरेन्द्र मोदी नेपाल भ्रमणमा आउने बताएका छन्।

प्रतिनिधिसभामा सांसदहरूले उठाएका प्रश्नको जवाफ दिँदै प्रधानमन्त्री प्रचण्डले यस्तो बताएका हुन् ।

प्रधानमन्त्री प्रचण्डले भने,‘मैले भारतीय प्रधानमन्त्रीलाई नेपाल भ्रमणको निम्तो दिएको छु । उपयुक्त समयमा मोदीजी नेपाल भ्रमणमा आउनुहुन्छ ।भ्रमणमा विषयमा भएका गतिविधि दूतावासमार्फत् सार्वजनिक जानकारी गराइएको छ ।’

तेस्रोपटक भारतको प्रधानमन्त्री भएका मोदीको शपथग्रहण समारोहमा सहभागी हुन प्रधानमन्त्री प्रचण्ड जेठ २७ गते भारत भ्रमणमा गएका थिए ।

भारतीय प्रधानमन्त्री मोदीको लिखित आमन्त्रणमा आफू भारत भ्रमणमा गएको प्रधानमन्त्री प्रचण्डले बताए ।

भारत भ्रमणले आपसी सद्भाव अभिवृद्धि गर्न उल्लेख्य भूमिका खेलेको उनले बताए ।

भ्रमणका क्रममा दुई देशबीचको सम्बन्धलाई अझै बलियो बनाउने कुराकानी भएको प्रधानमन्त्री प्रचण्डले बताए ।