मोरङ । विराटनगरमा पाहुना आएका एक युवकको हत्या भएको छ ।

सुनसरीको दुहवी नगरपालिका–१२ का २३ वर्षीय अक्लेशकुमार यादवको हत्या भएको हो ।

अक्लेश विराटनगर महानगरपालिका–४ इक्राहीस्थित रामलोचन यादवको घरमा पाहुना आएका थिए ।

रामलोचन अक्लेशका ठुलोबुवा हुन् । ठुलीआमाकी छोरीको बिहेमा आएका बेला अक्लेशको हत्या भएको जिल्ला प्रहरी कार्यालय मोरङले जनाएको छ ।

विराटनगर–४ का २४ वर्षीय गणेश यादवले चक्कु प्रहार गरेर अक्लेशको हत्या गरेका थिए ।

बिहेको कार्यक्रम सकिएपछि गणेश र अक्लेशबीच सामान्य विवाद भएको खुलेको छ ।

उनीहरुबीच के विषयमा विवाद भएको थियो भनेर यकिन भइसकेको छैन । विवादपछि अक्लेश मोटरसाइकल चढेर आफ्नो घरतर्फ जान खोज्दै थिए ।

घर जाने तयारीमा रहेका अक्लेशलाई बुधबार राति १० बजेतिर गणेशले चक्कु प्रहार गरेका थिए ।

विराटनगरको नोबेल शिक्षण अस्पतालमा उपचारका क्रममा आज अक्लेशको मृत्यु भएको प्रहरीले जनाएको छ । हत्यामा संलग्न गणेश फरार रहेका छन् ।