काठमाडौं । मनसुन भित्रिएसँगै राजमार्गमा पहिरो जान सुरु भइसकेको छ । आइतबार राती पहिरो गएपछि पृथ्वी राजमार्ग अवरुद्ध भएको छ ।

आइतबार राति २ बजेतिर वर्षासँगै आएको पहिरोले पृथ्वी राजमार्गको मुग्लिङ–नौबिसे सडक खण्ड अवरुद्ध भएको हो ।

इलाका प्रहरी कार्यालय मुग्लिङका अनुसार चितवनको इच्छाकामना–३ फिस्लिङ र मोवाखोलाको बीचमा पहिरो खसेको छ ।

पहिरो गएलगत्तै रातिदेखि नै लेदो पन्छाउने काम सुरु भए पनि सडक खुलेको छैन । सडक सञ्चालन गर्न अझै केही समय लाग्ने प्रहरीले जनाएको छ ।

पहिरोले दुवैतर्फका सवारीसाधन रोकिएका छन् । यात्रुहरु अलपत्र परेका छन् ।