काठमाडौं । मानव बेचबिखन अनुसन्धान ब्यूरोको टोलीले बालिकालाई भारतमा बेच्न लैजाने दुई जनालाई पक्राउ गरेको छ ।
ब्यूरोको टोलीले उनीहरुलाई ललितपुरको महानगरपालिका २७ सुनाकोठीबाट पक्राउ गरेको हो ।
पक्राउ पर्नेमा नुवाकोटको दुप्चेश्वर गाउँपालिका-६ घर भई काठमाडौंको तारकेश्वर बस्ने सम्बर बहादुर तामाङ र तादी गाउँपालिका-२ घर भई काठमाडौंको टोखा बस्ने इन्दिरा कटुवाल तामाङ रहेका छन्।
पोखरामा आफ्नै होटलमा वेट्रेसको काम भएको, सुरुमा महिनाको २० हजार तलब दिने र पछि तलब बढाउँदै लैजाने प्रलोभन देखाएर नाबालिकालाई भारत लैजान लागेका थिए।
ललितपुर महानगरपालिका-२७ सुनाकोठीमा प्रतिवादीले पीडित नाबालिकालाई लैजाँदै गरेको अवस्थामा ब्यूरोको टोलीले फेला पारी उद्धार गरेको थियो।
पक्राउ परेका दुवै जनालाई मानव बेचबिखन तथा ओसारपसार मुद्दामा काठमाडौं जिल्ला अदालतबाट ५ दिनको म्याद थप अनुमति लिई आवश्यक अनुसन्धान भइरहेको ब्यूरोले जनाएको छ।
Leave a Reply