काठमाडौं । प्रधानमन्त्री पुष्पकमल दाहाल ‘प्रचण्ड’ले भारतीय प्रधानमन्त्री नरेन्द्र मोदीलाई नेपाल भ्रमणको निम्तो दिएका छन् ।

भारतीय प्रधानमन्त्री मोदीको शपथग्रहण समारोहमा सहभागी भएका प्रधानमन्त्री प्रचण्डले उनलाई नेपाल भ्रमणको निम्तो दिएका हुन् ।

प्रधानमन्त्री प्रचण्डले भारतमा पनि गठबन्धनको सरकार बनेकाले काम गर्न सहज हुने बताए । दुवै देशको अनुभव एकअर्काका लागि फलदायी हुने उनले बताए ।

प्रधानमन्त्री प्रचण्डले भने, ‘भारतमा पनि गठबन्धनको सरकार बन्यो, त्यसले अब सहज हुन्छ । दुवैका अनुभव एकअर्काका लागि फलदायी हुन्छन् ।’

प्रचण्डले मोदीलगायत भारतीय नेताहरूसँगको भेटमा आफ्नो अघिल्लो भ्रमणमा भएका समझदारी कार्यान्वयनलाई तीव्रता दिनेबारे कुरा भएको बताए ।

पञ्चेश्वर आयोजनाको कार्यान्वयन, अरुण तेस्रो जलविद्युत् आयोजना र उर्जा व्यापारसँग सम्बन्धित विषयमा छलफल भएको उनले बताए ।