काठमाडौं । प्रहरीको केन्द्रीय अनुसन्धान ब्युरो (सीआईबी) ले ‘पेवल नेपाल र सजिलो पे’ का ६ कर्मचारीलाई पक्राउ गरेको छ ।

अवैध हुण्डी र सुन, क्रिप्टोको अवैध कारोबारमा जोडिएपछि सीआईबीले दुई वटा भुक्तानी सेवा प्रदायक कम्पनीका ६ कर्मचारीलाई पक्राउ गरेको हो ।

सीआईबीका अनुसार पक्राउ पर्नेहरुमा भीमप्रसाद तिमल्सिना, प्रज्वल आचार्य, सुरज जबरा, सुशील बन्जारा, काश्यव मानन्धर र अथुकछाक खम्पा छन् । पक्राउ परेका मध्ये खम्पा मेट्रो अस्पतालमा भर्ना भएका छन् ।

उनीहरुविरुद्ध आइतबार काठमाडौं जिल्ला अदालतबाट ६ दिनको म्याद थप भएको छ । झण्डै ६१ किलो सुन तस्करीको दोस्रो चरणको अनुसन्धानमा डिजिटल भुक्तानी कम्पनीहरू पे वेल र सजिलो पे पनि तानिएका छन् ।

यसअघि नेपाल राष्ट्र बैंकले यी दुवै सेवा प्रदायक कम्पनीको बैंक खाता रोक्का गरेको थियो ।

भुक्तानी सेवा प्रदायक संस्थाहरू पेवेल नेपाल प्रालि र सजिलो पे पेमेन्ट सर्भिसेज प्रालिबाट भएका कारोबारहरू नियामकीय अनुपालना सम्बन्धी छानबिन भइरहेको भन्दै राष्ट्र बैंकले खाता रोक्का गरेको जनाएको थियो ।