काठमाडौँ । नेकपा माओवादी केन्द्रका नेता अग्नि सापकोटाविरुद्धको रिटमा सर्वोच्च अदालतले असार १२ गते निर्णय सुनाउने भएको छ ।

काभ्रेका अर्जुन लामाको हत्याको विषयमा पूर्वसभामुख समेत रहेका सापकोटामाथि छानबिनको माग गर्दै परेको रिटमाथि १९ वर्षपछि सर्वोच्चले निर्णय दिने मिति तय गरेको हो ।

संवैधानिक इजलासले गत वैशाख १२ गतेदेखि उनीविरुद्धको रिटको अन्तिम सुनुवाइ थालेर हेर्दाहेर्दैमा राखेको थियो ।

बुधबार प्रधानन्यायाधीश विश्वम्भरप्रसाद श्रेष्ठ र न्यायाधीशहरु प्रकाशमान सिंह राउत, सपना प्रधान मल्ल, प्रकाश कुमार ढुंगाना र कुमार रेग्मीको इजलासले सापकोटासँग सम्बन्धित तीनवटा रिटमा आदेश सुनाउने मिति तोकेको हो ।

सापकोटा प्रहरी र अदालतको सम्पर्कमा नगएपछि हत्या भएका अर्जुन लामाकी श्रीमती पूर्णीमायाले ०६९ मंसिर ७ गते सर्वोच्चमा रिट दायर गरेकी थिइन् ।