काठमाडौं । प्रधानमन्त्री पुष्पकमल दाहाल ‘प्रचण्ड’, कांग्रेसका सभापति शेरबहादुर देउवा र एमालेका अध्यक्ष केपी शर्मा ओलीबीच भेटवार्ता भएको छ ।
बालुवाटारमा सोमबार प्रचण्ड, ओली र देउवाबीच डेढ घण्टा बढी छलफल भएको हो ।
उनीहरुबीच कांग्रेसले संसद् खोलेपछि पहिले बन्द भएको अवधिको क्षतिपूर्ति हुने गरी संसद्लाई बिजनेस दिनेबारे छलफल भएको प्रधानमन्त्रीको सचिवालयले जनाएको छ ।
उनीहरुबीच विधेयकहरू अड्किएर बसेकाले यिनीहरूलाई प्रभावकारी रूपले अगाडि बढाउने विषयमा छलफल भएको हो ।
सदनलाई प्रभावकारी ढङ्गबाट अगाडि बढाउने उपायका साथै सहकारी छानबिन समिति गठन भैसकेपछिको अवस्थाबारे छलफल भएको छ ।
तीन नेताको भेटपछि प्रधानमन्त्री प्रचण्ड र एमाले अध्यक्ष ओलीबिच पनि केहीबेर छुट्टै छलफल पनि भएको बालुवाटार स्रोतले बतायो ।
शीर्ष तीन नेता भेट्नुअघि बालुवाटारमा नेकपा एकीकृत समाजवादीका अध्यक्ष माधवकुमार नेपाल पुगेका थिए ।
नेपालसँग प्रधानमन्त्रीले प्रदेश सरकार र समसामयिक विषयमा कुराकानी भएको थियो ।
Leave a Reply