काठमाडौं । नेपाली कांग्रेसका सांसद रामहरि खतिवडाले गृहमन्त्री रवि लामिछानेको निर्देशनमा ट्राफिक प्रहरीले थालेको कारबाहीविरुद्ध आक्रोश पोखेका छन् ।

बसेको प्रतिनिधिसभा बैठकमा बोल्दै सांसद खतिवडाले गृहमन्त्रीको सनकका भरमा कसैलाई सडकमा उभ्याएन नपाइने बताएका हुन्।

उनले संविधान र कानूनविपरीतको काम रोक्न सरकारलाई रुलिङ गर्न आग्रह गरे ।

सांसद खतिवडाले भने, ‘कानूनी राज्यको स्थापनाका लागि हामीले हुकुमी शासनविरुद्ध लड्यौँ । अहिले गृहमन्त्रीको ट्वीटका आधारमा मापसे गरेकालाई सडकमा उभ्याइन थालिएको छ । मापसे गरेका मानिसलाई पहेँलो ज्याकेटमा सडकमा ल्याएर उभ्याउँदा स्वयंसेवक गर्नेहरूको मनोबल गिरेको छ।’

खतिवडाले मापसे कारबाहीमा परेर लर्बराएकालाई सडकमा उतार्ने काम बन्द गर्न सरकारसँग माग गरे ।

उपप्रधान एवं गृहमन्त्री लामिछानेको निर्देशनपछि ट्राफिक कारबाहीमा परेका व्यक्तिलाई प्रहरीले स्वयंसेवक बनाउन थालेको छ ।

त्यसविरुद्ध परेको रिटमाथि आइतबार सर्वोच्च अदालतमा सुनुवाइ हुँदैछ ।