काठमाडौं । जनता समाजवादी पार्टी (जसपा)का अध्यक्ष अशोक राईले उपेन्द्र यादवको कार्यशैलीकै कारण आफुहरु अलग भएको बताएका छन्।

जसपा नेपालबाट अलग भएपछि आयोजित पत्रकार सम्मेलनमा बोल्दै अध्यक्ष राईले यस्तो बताएका हुन् ।

राईले जसपा नेपालको महाधिवेशनलाई एकताको महाधिवेशन नबनाएर कुनै एक व्यक्तिलाई श्रीपेच लगाउने गरी अघि बढाएपछि पार्टी विभाजन गर्न बाध्य बनेको बताए ।

अध्यक्ष राईले भने, ‘यहाँ अल्पमत र बहुमतको कुरा भएन । महाधिवेशनलाई एकताको महाधिवेशन भनिएको थियो । पार्टीभित्रको अन्तर्विरोध र समस्यालाई समाधान गर्न र अगाडिको मार्ग प्रशस्त गर्ने यसको उद्देश्य थियो । तर, यहाँ कुनै नेतालाई श्रीपेचलाई लगाउन खोजियो । पार्टी कब्जा गर्ने रणनीति देखियो ।’

उनले महाधिवेशनबाट पार्टीको समस्या समाधान गर्नेभन्दा पनि पार्टीलाई कब्जा गर्ने रणनीति लिइएको आरोप लगाए।

उनले महाधिवेशनका लागि प्रतिनिधि छनोटप्रति नै प्रश्न उठाए । अध्यक्ष राईले अनियमित ढङ्गले महाधिवेशन प्रतिनिधि छनोट गरिएको दाबी गरे ।