काठमाडौं । नेकपा एमालेका महासचिव शंकर पोखरेलले लाहुरे संस्कृति मुलुकको विकास र समृद्धिको बाधक रहेको बताएका छन् ।

१३५औं अन्तर्राष्ट्रिय श्रमिक दिवसको अवसरमा बुधबार काठमाडौंमा आयोजित कार्यक्रममा बोल्दै जागिरको खोजी गर्ने र काम गर्नका लागि विदेश जान खोज्ने लाहुरे संस्कृति विकासको बाधक भएको बताएका हुन् ।

‘ठूलो संख्यामा युवाहरु वैदेशिक रोजगारीको सिलसिलामा जाने जुन परिस्थिति उत्पन्न भएको छ । त्यसमा दुई प्रकारका मनोविज्ञानहरुले काम गरेको छ’, उनले भने, ‘एउटा मनोविज्ञान देशभित्र काम गर्न नचाहने, देशभित्र रोजगारीको कुरा गर्दाखेरि सरकारी जागिरको खोजी गर्ने र काम गर्नका लागि बाहिर जाने लाहुरे संस्कृति स्वाभाविक रुपमा हाम्रो मुलुकको विकास र समृद्धिको बाधक रहेको छ भने अर्को रोजगारीका अवसरहरुको अभाव नेपालको श्रम पलायनताको एउटा कारण बनिरहेको छ ।’

महासचिव पोखरेलले मुलुकमै काम गर्ने मनोविज्ञान विकास नहुँदासम्म अर्थतन्त्रलाई सही बाटोमा अगाडि बढाउन नसकिने बताए । उनले भने–‘स्वदेशमै केही गर्छु भन्ने कुरालाई आत्मसात् गर्न जरुरी छ । हामीले स्वदेशी श्रमप्रति सम्मान गर्ने संस्कृतिको विकास गर्नुपर्छ ।’

महासचिव पोखरेलले सबै श्रमिकलाई योगदानमा आधारित सामाजिक सुरक्षा कार्यक्रमको दायरामा ल्याउन पनि सरकारसँग आग्रह गरेका छन् ।