बुटवल । सुप्रिम सहकारीको रकम हिनामिना प्रकरणमा मुछिएका दीपेश पुन रिहा भएका छन् ।

सहकारी ठगी प्रकरणमा अदालतले रिहा गर्न आदेश दिएको एक हप्तापछि पुन ४ लाख धरौटी रकम जम्मा गरेर रिहा भएका हुन्।

वैशाख ७ गते शुक्रबार रुपन्देही जिल्ला अदालतले थुनछेक बहसपछि ६ जनालाई धरौटीमा रिहा गर्न आदेश दिएको थियो ।

पाँच जना सोही दिन छुटेका थिए । पुन भने आज रकम जम्मा गरेर कारागारबाट निस्किएका हुन् । उनी पूर्वउपराष्ट्रपति नन्दकिशोर पुनका छोरा हुन् ।

न्यायाधीश डा.श्रीप्रकाश उप्रेतीको इजलासले पुनसँग ४ लाख धरौटी माग गरेको थियो ।

अदालतले गत शुक्रवार अध्यक्ष ओमप्रकाश गुरुङबाहेक अन्यलाई धरौटीमा छाड्न आदेश दिएको थियो ।

अध्यक्ष गुरुङ भने भैरहवास्थित कारागारमा छन् ।