एजेन्सी । फ्रान्सको राजधानी पेरिसमा एक अपार्टमेन्टमा विस्फोटपछि भएको आगलागीमा परेर तीन जनाको मृत्यु भएको छ ।

पेरिसको एरोन्डिसमेन्टमा आइतबार साँझ यो विस्फोट भएको हो । तर, विस्फोटको कारण भने खुल्न सकेको छैन ।

प्रारम्भिक जाँचका अनुसार रु डे क्यारोनको सातौँ तल्लामा आगलागी हुनुअघि विस्फोट भएको थियो ।

यो मामिलाको छानबिन आगलागी वा क्षति र हत्याको कोणबाट पनि भइरहेको बताइएको छ । विस्फोटको कारण पत्ता लगाउन राजधानीको दोस्रो न्यायिक प्रहरी जिल्लाका अनुसन्धानकर्तालाई खटाइएको छ ।

विस्फोटपछि नजिकैका भवनहरूमा बस्ने मानिसहरूलाई घरबाट बाहिर निकालिएको थियो । अहिले यस विषयमा अनुसन्धान भइरहेको छ ।

फ्रान्सको राजधानीमा पछिल्लो केही वर्षमा तेस्रो पटक यस्तो खालको विस्फोट भएको हो ।

यसअघि सन् २०१९ मा पनि रु डे ट्राभिसमा यस्तै विस्फोट भएको थियो जसमा चार जनाको मृत्यु भएको थियो ।

गत वर्ष जुनमा पनि २७७ रु सेन्ट ज्याकमा विस्फोट भएको थियो जसमा तीन जनाको मृत्यु भएको थियो ।