देउखुरी । लुम्बिनी प्रदेशका मुख्यमन्त्री डिल्लीबहादुर चौधरीले चैत २२ गते विश्वासको मत लिने भएका छन् ।

मुख्यमन्त्री चौधरीले चैत २२ गते दिउँसो ४ बजे विश्वासको मत लिने तयारी थालेका हुन् । केन्द्रमा नयाँ गठबन्धन बनेसँगै मुख्यमन्त्री चौधरीले नेकपा माओवादी केन्द्रका मन्त्रीलाई बर्खास्त गरेका थिए ।

त्यसपछि माओवादीले सरकारलाई दिएको समर्थन फिर्ता लिएको थियो । लुम्बिनी प्रदेश सरकारको मन्त्रिपरिषद् बैठकले बिहीवार बजेट अधिवेशन आह्वान गर्ने निर्णय गरेको छ ।

मुख्यमन्त्री चौधरीले विश्वासको मत प्रयोजनका लागि अधिवेशन आह्वान गरेका छन्। सरकारमा सहभागी दलले समर्थन फिर्ता लिएपछि ३० दिनभित्र विश्वासको मत लिनुपर्ने संवैधानिक व्यवस्था छ ।

त्यसैका आधारमा मुख्यमन्त्री चौधरीले विश्वासको मत लिन लागेका हुन् ।