काठमाडौं । नेकपा एमालेका सांसद कृष्णगोपाल श्रेष्ठले दुर्गा प्रसाईंले जस्तै हतियार बोक्ने अरुपनि हुनसक्ने भन्दै छानबिन गर्न गृहमन्त्री रवि लामिछानेलाई आग्रह गरेका छन् ।

बुधबार राज्य व्यवस्था तथा सुशासन समितिको बैठकमा बोल्दै सांसद श्रेष्ठले यस्तो बताएका हुन् ।

उनले गृहमन्त्री लामिछानेको सुरक्षाको लागि प्रसाईंको जस्तो हतियार छ कि छैन ? भनेर प्रश्न गरे।  बैठकमा बोल्दै सांसद श्रेष्ठले राज्यका उच्च पदस्थ व्यक्तिहरुको सुरक्षाको सम्बन्धमा प्रश्न गरे।

सांसद श्रेष्ठले भने,‘एउटा नागरिकको सुरक्षाको लागि त्यो तहको हतियार बोक्नुपथ्र्यो कि पर्दैनथ्यो ? त्यति संख्याको गोलिगट्ठा बोक्नुपर्थ्यो कि पर्दैनथ्यो ? यो मुलुकको राष्ट्रपतिको सुरक्षामा हिड्ने सुरक्षाका अगुवा र पछुवाले कुन तहको हतियार बोक्छन् ? प्रधानमन्त्री, गृहमन्त्री हिड्दाखेरी अगाडि, पछाडि त्यो तहको हातहतियार र गोलिगट्ठासहित हिँड्ने गर्नुभएको छ कि छैन ? जवाफ दिनुपर्‍यो नि ।’

उनले दुर्गा प्रसाईंजस्तो नागरिकले उच्च तहको हतियार बोकेर हिँड्ने गरेको भन्दै उनलाई त्यो तहको सुरक्षा आवश्यक थियो कि थिएन भनेर प्रश्न गरे ।

उनले राष्ट्रपति, प्रधानमन्त्री र गृहमन्त्री त्यो तहको हतियार बोकेर हिँड्छन् हिँड्दैन भनेर प्रश्न गरे । सांसद श्रेष्ठले हतियार बोक्न अनुमति दिने अधिकारीको सम्बन्धमा पनि प्रश्न उठाएका छन् ।