काठमाडौं । राष्ट्रिय प्रजातन्त्र पार्टी(राप्रपा)का नेता बुद्धिमान तामाङले उपप्रधानमन्त्री तथा गृहमन्त्री रवि लामिछानेलाई हचुवाका भरमा कसैलाई पक्राउ नगर्न सुझाव दिएका छन् ।

राज्य व्यवस्था समितिका सदस्यसमेत रहेका तामाङले कृष्णबहादुर महरा पक्राउ प्रकरणलाई उदाहरणमा रुपमा प्रस्तुत गर्दै हचुवाका भरमा कसैलाई पक्राउ नगर्न सुझाव दिएका हुन् ।

समितिको बुधबार बसेको बैठकमा महरा पक्राउ प्रकरणलाई उदाहरणमा रुपमा प्रस्तुत गर्दै उनले प्रश्न गरे– गर्न खोजेको चाहिँ के हो ?

तामाङले महरालाई प्रहरीले बुटवलबाट नियन्त्रणमा लिएर काठमाडौं ल्याएको र स्वास्थ्य अवस्थाका कारण हस्पिटल पठाइएको स्मरण गराए ।

तामाङले भने,‘नियतवश मान्छे समात्ने, बेइज्जत गर्ने अनि पछि छाड्ने ! यसरी हचुवाको भरमा काम गर्न भएन ।’

यस्ता कार्यशैली मान्छेलाई बदनाम गर्ने खालको कुरामात्र भएको उनको भनाइ छ । उनले बाँसबारी छाला जुत्ता कारखानाको जग्गा सरकारले फिर्ता लिएको कि सम्बन्धित व्यक्तिले फिर्ता गरेको भन्ने प्रश्न पनि गरे ।

बालुवाटार जग्गा काण्डमा कसैले जग्गा फिर्ता गरेकै कारण मुद्दा नचलाइएको जिकिर गर्दै उनले बाँसबारी छाला जुत्ता कारखानाको जग्गा प्रकरणमा पनि उस्तै प्रवृत्ति देखिएको बताए ।