काठमाडौं । त्रिभुवन विश्वविद्यालयका उपप्राध्यापक प्रेम चलाउनेमाथि कुटपिटमा संलग्न रविनमान लामा पक्राउ परेका छन् ।

काठमाडौं प्रहरी परिसरका अनुसार उपप्राध्यापक चलाउनेमाथि कुटपिट घटनामा दोषी ठहर भएका लामा काठमाडौंबाट पक्राउ परेका हुन् ।

२०७८ वैशाख १६ गते नै पक्राउ पुर्जी जारी भएका उनी फरार थिए । गएको मंसिर ७ गते काठमाडौं जिल्ला अदालतले उनीसहित ६ जनालाई दोषी ठहर गरेको थियो ।

उनीहरूलाई जनही २ वर्षको कैद सजायको फैसला भएको छ । साथै पीडित चलाउनेको उपचारमा लागेको खर्चबापत २८ लाख १७ हजार ५९३ रुपैयाँ क्षतिपूर्तिसमेत भराउन भनिएको छ ।

०७७ कार्तिक २० गते चलाउनेले काठमाडौं जिल्ला अदालतमा ज्यान मार्ने उद्योगमा उक्त मुद्दा दर्ता गराएका थिए ।