काठमाडौं । प्रधानमन्त्री पुष्पकमल दाहाल ‘प्रचण्ड’ले कानून र राष्ट्रको हित विपरीत कुनै पनि काम नगर्ने बताएका छन्।

सोमबार सचिवहरूसँगको नियमित बैठकमा बोल्दै प्रधानमन्त्री प्रचण्डले यस्तो बताएका हुन् ।

प्रधानमन्त्री प्रचण्डले सचिवहरुलाई नडराई कानूनबमोजिम काम गर्न निर्देशन दिए।  प्रधानमन्त्री प्रचण्डले सुशासन आफ्नो पहिलो प्राथमिकता भएको उल्लेख गरे ।

प्रधानमन्त्री प्रचण्डले भने, ‘म आफू राष्ट्र र कानून विपरीतको कुनै काम गर्दिनँ । तपाईंहरू पनि यस्तो कार्यमा नलाग्नुहोला।असल नियतले काम गरेको विषयमा निर्दोष मानिसलाई कहीं कतै समस्या भएमा त्यसको जिम्मेवारी मैले लिनेछु । तपाईंहरू ढुक्कले काम गर्नुस्।’

प्रधानमन्त्रीले सचिवहरूलाई कार्यसम्पादन गर्दा कसैको भय र त्रासमा नपर्न पनि आग्रह गरेका छन् ।

नयाँ समीकरणको सरकार थप ऊर्जा, नयाँ सोच, उद्देश्य, कार्यसूची र कार्ययोजनाका साथ आएको बताउँदै प्रधानमन्त्री प्रचण्डले सोहीअनुरूप अगाडि बढ्न निर्देशन दिए ।

नागरिकले प्रत्यक्ष अनुभूति गर्ने गरी सेवाप्रवाह गर्न जोड दिंदै प्रधानमन्त्रीले कुनै पनि सरकारी सेवा लिन नागरिकले भोगेका सास्ती हटाउने काम तत्काल प्राथमिकतामा राख्न निर्देशन दिए।