काठमाडौं । प्रधानमन्त्री पुष्पकमल दाहाल ‘प्रचण्ड’ र राष्ट्रिय स्वतन्त्र पार्टीका सभापति रवि लामिछानेबीच वार्ता भइरहेको छ । उनीहरुबीच बालुवाटारमा भेटवार्ता भइरहेको हो ।

नयाँ सत्ता गठबन्धनका दलबीच मन्त्रालय भागबन्डा गर्न सकस भइरहेका बेला रास्वपा सभापति र प्रधानमन्त्री प्रचण्डबीच केही बेरअघि देखि छलफल भइरहेको बताइएको छ । उनले गृह मन्त्रालयमा दाबी गरिरहेका छन् ।

यसअघि एमाले नेतृत्वकै गठबन्धन हुँदा गृहमन्त्री बनिसकेका रवि नागरिकता प्रकरणका कारण पदबाट हट्नुपरेको थियो । सत्तारुढ दलमा भागबन्डाको विषय पेचिलो बनेसँगै मन्त्रालयले पूर्णता पाउन सकेको छैन ।

गृह, अर्थ, भौतिक, सहरी विकासलगायत मन्त्रालयमा माओवादी, एमाले र रास्वपा तीनवटै दलले आ–आफ्नो दाबी नछाडेपछि मंगलबार साँझसम्म कुनै निर्णय हुन सकेको छैन ।