कैलाली । जिल्लामा २ लाख ५८ हजार बालबालिकाहरुलाई दादुरा–रुबेला विरुद्धको खोप लगाइने भएको छ ।

नौ महिनादेखि १५ वर्ष उमेरसमूहका करिब २ लाख ५८ हजार १६५ बालबालिकाहरुलाई खोप लगाउन लागिएको हो ।

स्वास्थ्य कार्यालय कैलालीका अनुसार ९६४ खोप केन्द्र र दुई सय ९२ स्वास्थ्यकर्मीहरु परिचालन गरेर खोप दिन लागिएको छ ।

खोप सुरक्षित र प्रभावकारी रहेकाले सबैले आ–आफ्नो बालबालिकालाई खोप लगाउन स्वास्थ्य कार्यालयको अनुरोध छ ।

यही फागुन १३ गतेदेखि चैत १ गतेसम्म सञ्चालन हुने उक्त अभियानमा २९२ स्वास्थ्यकर्मीहरु परिचालन गरिने स्वास्थ्य कार्यालय कैलालीले जनाएको छ ।

खोप अभियानकै क्रममा नियमित खोप छुटेका बालबालिकालाई पनि छुट खोप दिइने छ । नियमित खोप छुट भएका बालबालिकाहरुको खोप कार्ड लिई आउन स्वास्थ्य कार्यालयको आग्रह छ ।

सन् २०२६ सम्म दादुरा–रुवेला निवारण गर्ने लक्ष्यका साथ यसपटक सरकारले खोप अभियान सञ्चालन गर्न लागेको हो ।