सर्लाही । सर्लाहीको बरहथवामा ट्याक्टर दुर्घटना हुँदा दुई जनाको मृत्यु भएको छ भने अन्य ७ जना घाइते भएका छन् ।

दुर्घटनामा बाराको गढिमाई नगरपालिका-९ का ५५ वर्षीय जयलाल सहनी र गढिमाईकै ५० वर्षीय रामनाथ सहनीको मृत्यु भएको हो । जयलाल सहनी ट्याक्टर धनी हुन्। ट्याक्टर पनि उनैले चलाएको बेला दुर्घटनामा परेको हो ।

रौतहटको सीमा नजिकै पर्ने बरहथवा नगरपालिका-१५ पिप्राभित्तामा नम्बर नखुलेको ट्याक्टर बुधबार दिउँसो सडकबाट झण्डै ३० फिट तल बागमती नदीको नहरमा खस्दा उनीहरुको मृत्यु भएको जिल्ला प्रहरी कार्यालय सर्लाहीले जनाएको छ ।

दुर्घटनामा बारा गढिमाईकै १७ वर्षीय आकाश सहनी, १२ वर्षीय किसन सहनी, ४८ वर्षीया गर्भी देवी सहनी, ४५ वर्षीया सुखली देवी, १८ वर्षीय नितेश सहनी, १६ वर्षीया किशोरी अञ्चलाकुमारी र ६७ वर्षीय वृद्ध रामप्रसाद सहनी घाइते भएका छन् ।