काठमाडौं । नेपाल ‘ए’ले क्यानडा-११ लाई जीतका लागि २१७ रनको लक्ष्य दिएको छ ।

मूलपानी क्रिकेट मैदानमा आइतबार जारी खेलमा निर्धारित ५० ओभरमा नेपालले ८ विकेट गुमाएर २१६ रन बनायो ।

मुलपानी क्रिकेट मैदानमा क्यानडाका कप्तान साद बिन जफरले टस जितेर पहिलो फिल्ड गर्ने निर्णय लिएका हुन् । नेपालका लागि बसिर अहमदले सर्वाधिक ५० रन बनाएर अविजित रहे भने रशिद खानले ४० रन बनाए ।

त्यसैगरी मयन यादवले ३५ रन, किरण थगुन्नाले २५ रन, सन्दीप जोराले १४ रन बनाए । प्रतिस जिसीले ४ रन, अर्जुन कुमालले ४ र विनोद भण्डारीले ५ रन मात्र जोड्न सके। शाहब आलमले २ रन बनाएर अविजित रहे ।

क्यानडाका लागि साद जफरले ३ विकेट, ईश्वरजोत सोहीले २ विकेट, डिलन हेलिगर, हर्ष ठाकर र शाहिद अहमदजाईले एक एक विकेट लिए । यो सिरिजको दोस्रो खेल मंगलबार र तेस्रो तथा अन्तिम खेल बिहीबार हुनेछ।