काठमाडौं । विहिबार एकाएक प्रधानमन्त्री पुष्पकमल दाहाल र अर्थमन्त्री डा. प्रकाशशरण महतबीचको सम्बन्धमा दरार उत्पन्न भएको समाचार भाइरल बनेपछि अज अर्थमन्त्री महतले पत्रकार सम्मेलन नै गरेर प्रधानमन्त्रीसँग सम्बन्ध नविग्रिएको बताएका छन् ।

उनले प्रधानमन्त्रीसँग राम्रो समन्वय भइरहेको बताउँदै ‘प्रधानमन्त्रीसँग अर्थमन्त्रीको सम्बन्ध बिग्रिएको’ भनेर प्रचार गरिएकोप्रति आपत्ति जनाए । आज विहान मन्त्रालयमा पत्रकार सम्मेलन गर्दै मन्त्री महतले प्रधानमन्त्री र मन्त्रीहरूसँग समन्वयमा कुनै समस्या नरहेको दाबी गरे ।

उनले भने–‘कता–कता आइरहेको छ, कि अर्थमन्त्रीले बजेट कटौती गरे, त्यसमा प्रधानमन्त्रीको पनि सहमति छैन, प्रधानमन्त्री र अर्थमन्त्रीबीचमा विवाद छ भनेर प्रचार भएको छ । कसले किन यस्तो भ्रमपूर्ण प्रचार गरेको हो ? म आफैँ अचम्मित छु । वास्तवमा प्रधानमन्त्रीसँग कुनै वादविवाद छैन । राम्रो समन्वय र छलफल भइरहेको छ । विवादको कुनै कुरा छैन । यस्तो भ्रमको सञ्चार नगरिदिन मेरो आग्रह छ ।’

अर्थमन्त्री महतले मन्त्रालयले संसद्बाट पारित गरेको बजेट कटौती नगरेको, बरू अर्धवार्षिक समीक्षा गरेको बताए । उनले भने–‘अर्थमन्त्रीले बजेट कटौती गरेको समाचारहरू आयो । बजेट कटौती गरेको होइन, तर त्यसरी प्रचार गरियो, त्यो गलत हो । बजेट संसद्बाट पारित भएको हो ।’

संसद्ले पारित भएको बजेटलाई हामीले बीचैमा फेरबदल गर्ने वा कटौती गर्ने भन्ने कुरा हुँदैन । हामीले छ महिनामा के ग¥यौँ ? अब के गर्छौ ? भन्ने कुरामा हामीले छलफल गरेको हो, अनुमान गरेको हो र समीक्षा गरेको हो । यसको गलत सन्देश जाने गरी प्रचार भएको छ, म यसमा भ्रमित नहुन आग्रह गर्दछु ।’ पत्रकार सम्मेलनमा मन्त्री महतले भने ।