काठमाडौं । ललितपुरको बालकुमारी घटनाबारे छानबिन गर्न बनेको जाँचबुझ आयोगले भौतिक पूर्वाधार तथा यातायातमन्त्री प्रकाश ज्वालाको बयान लिएको छ ।

आयोगले मन्त्री ज्वालाले केही दिनअघि बयान दिएको खुलेको हो । कोरिया भाषा परीक्षा सम्बन्धी विवादमा परीक्षार्थीहरुले आन्दोलन गरिरहेका बेला मन्त्री ज्वाला सवार गाडीसमेत सो स्थानमा पुगेको थियो ।

सोही स्थानमा आन्दोलनरत विद्यार्थीले मन्त्री ज्वाला सवार गाडी जलाएका थिए । उक्त घटना घट्नुमा मन्त्री ज्वालाले उत्प्रेरक भूमिका निर्वाह गरेको आरोप लागेको थियो ।

सो घटनामा प्रहरीले बल प्रयोग गर्दा दैलेखका सुजन रावत र अछामका विरेन्द्र शाहको मृत्यु भएको थियो ।

सरकारले उक्त घटनाको छानविनका लागि उच्च अदालत पाटनका पूर्व न्यायाधीश शेखर पौडेलको संयोजकत्वमा समिति बनाएको थियो ।