भैरहवा । अर्थमन्त्री डा.प्रकाशशरण महतले कर्मचारीलाई क्षमतामाथि प्रश्न उठे जुनसुकै बेला सरुवा हुने चेतावनी दिएका छन् ।

बुधबार भैरहवा भन्सार कार्यालयको निरीक्षण गर्दै अर्थमन्त्री महतले यस्तो चेतावनी दिएका हुन् ।

अर्थमन्त्री महतले भने,‘कार्यरत कर्मचारी एक वर्ष नभई सरुवा गर्न नमिल्ने भन्ने अहिले छैन, क्षमतामा प्रश्न उठ्यो भने जुनसुकै बेला पनि सरुवा हुनसक्छ । यद्यपि कर्मचारीलाई मैले अविश्वास गर्न खोजेको होइन ।’

अर्थमन्त्री महतले कर्मचारीलाई कर्तव्यनिष्ठ र समर्पित भएर काम गर्न निर्देशन दिए । काम गर्न नसके ठाउँ छाड्नु पर्ने समेत उनको चेतावनी छ ।

उनले भैरहवा भन्सारलाई सशक्त नेतृत्व दिन, अन्य निकायसँग राम्रो समन्वय गर्ने, सुरक्षा निकायसँग निरन्तर समन्वय राखेर चोरी निकासी रोक्ने, छिटो भन्सारलाई सिस्टममा राख्न र जिम्मेवारीलाई उच्च सर्तकताका साथ निरन्तर खबरदारी गर्न समेत निर्देशन दिए ।