एजेन्सी । र्‍यापर किलर माइकलाई सोमबार पक्राउ गरिएको छ । लस एन्जलसको एरिनामा आयोजित ग्रामी अवार्डमा तीनवटा ग्रामी जितेको केही समयपछि उनलाई पक्राउ गरिएको थियो ।

तर, केही समयपछि उनी रिहा भए । एरिनामा ग्रामी अवार्ड आयोजना भइरहेका बेला ब्याकस्टेजमा हातपात भएको थियो।

सामाजिक सञ्जालमा एक पोस्टमा लस एन्जलस पुलिसले भनेअनुसार किलर माइकलाई ‘मिसिडिमिना ब्याट्री’ को आरोपमा हिरासतमा लिइएको थियो ।

पक्राउ पर्नुभन्दा ठीक अघि माइक स्टेजमा ग्रामोफोन ट्रफी हल्लाउँदै थिए । उनको हातमा तीनवटा ग्रामी अवार्डहरू थिए ।

उनी जितको उत्सव मनाइरहेको थिए । सोमबार अमेरिकाको लस एन्जलसमा संगीत जगतको प्रतिष्ठित अवार्ड ‘ग्रामी’ अवार्डको आयोजना गरिएको थियो ।

यस अवार्डमा कुल ९४ विधामा कलाकारलाई सम्मान गरिएको थियो । टेलर स्विफ्टको एल्बम ‘मिडनाइट्स’ ले एल्बम अफ द इयर अवार्ड पायो ।

माइली साइरसको गीत ‘फ्लावर’ ले रेकर्ड अफ द इयरको ग्रामी अवार्ड पाएको छ ।

गीत अफ द इयरको अवार्ड बिली इलिशको गीत ‘ह्वाट वाज आई मेड फर’ लाई दिइएको छ ।

माइली साइरसको गीत ‘फ्लावर’ लाई उत्कृष्ट पप सोलो परफॉर्मन्सको लागि पनि ग्रामी दिइएको छ ।