रामेछाप । रामेछापमा जलाउँदै गरेको शव लिखु खोलाले बगाएको छ । शनिबार उमाकुण्ड गाउँपालिका–१, बाल्दिङ गुम्देलका ३२ वर्षीय झपटबहादुर थापाको शव खोलाले बगाएको हो ।

शनिबार अपराह्न ६ बजेतिर उमाकुण्ड गाउँपालिकामा पर्ने लिखु-२ जलविद्युत् आयोजनाले अकस्मात बाँध खोल्दा लिखु नदीमा जलिरहेको लास बगेको जिल्ला प्रहरी कार्यालय रामेछापले जनाएको छ ।

मलामी सबै सकुशल रहेका छन भने शवको खोजीकार्य जारी रहेको बताइएको छ । रामेछापसँगै सोलुखुम्बु प्रहरी र स्थानीयले समेत शवको खोजीकार्य गरिरहेका छन् ।

शुक्रबार मृत्यु भएका थापाको शव पोस्टमार्टमपछि दाहसंस्कार गर्न लगिएको थियो । उनले आत्महत्या गरेको खुलेको थियो । बाँध खोलीदिएकोमा स्थानीयहरु आयोजनासँग रुष्ट बनेका छन् ।

जलविद्युत् आयोजनाहरुले बाँध खोल्नु पर्दा सार्वजनिक सूचना जारी गरेरमात्र खोल्नु पर्ने प्रावधान छ ।