काठमाडौं । उपराष्ट्रपति रामसहायप्रसाद यादव र नेपालका लागि भारतीय राजदूत नवीन श्रीवास्तवबीच शिष्टाचार भेटवार्ता भएको छ ।

उपराष्ट्रपति यादव र राजदूत श्रीवास्तवबीच लैनचौरस्थित उपराष्ट्रपतिको कार्यालयमा भेटवार्ता भएको हो ।

भेटमा परस्पर शुभकामना आदान–प्रदानपछि दुई मुलुकको सम्बन्ध, उच्चस्तरीय भ्रमण, आर्थिक सहयोग, नेपालको विकास प्राथमिकताहरु, क्षेत्रीय तथा अन्तर्राष्ट्रिय मञ्चहरुलगायत विविध विषयमा छलफल भएको उपराष्ट्रपति कार्यालयले जनाएको छ।

उपराष्ट्रपति यादवले नेपाल र भारतबीच सौहार्द्रता, मित्रता, सद्भावना, आपसी समझदारी र सहयोगले गाँसिएको गहिरो एवं बृहत् सम्बन्ध रहेको बताए ।

उनले नेपाल–भारत संयुक्त आयोगको सातौं बैठकको क्रममा नेपाल आएका भारतीय विदेशमन्त्री एस जयशंकरले हामीबीच आदानप्रदान भएका दीर्घकालीन ऊर्जा व्यापार लगायतका सम्झौताहरू हुनु महत्वपूर्ण उपलब्धि भएको बताए ।

भारतका राजदूत श्रीवास्तवले दुई मुलुकबीच बहुआयामिक सम्बन्ध रहेको जनाउँदै भारत संधै नेपालको विकास यात्रामा सहयोगी रहेको र अगामी दिनहरुमा पनि रहिरहने बताए ।