काभ्रे । इन्द्रावती खोला नजिकै पानी जमेको पोखरीमा डुबेर पाँच वर्षीया बालिकाको मृत्यु भएको छ ।

काभ्रेको धुलिखेल नगरपालिका-६ ईतोल घर भई हाल भुम्लु गाउँपालिका-१० दोलालघाटमा बस्दै आएका बुद्धराम खड्गीको ५ वर्षीया छोरी रोजिनाको इन्द्रावती पोखरीमा डुबेर मृत्यु भएको हो ।

घर नजिकैको पोखरीमा बालिका डुबेको खबर पाएपछि प्रहरी चौकी दोलालघाटको टोली घटनास्थलमा पुगेको थियो।

प्रहरी टोलीले बालिकालाई उद्धार गरी धुलिखेल अस्पताल पठाएकोमा अस्पतालले मृत घोषणा गरेको जिल्ला प्रहरी कार्यालय काभ्रेले जनाएको छ।

घटनाबारे थप अनुसन्धान भइरहेको प्रहरीले जनाएको छ ।