काठमाडौं । ललितपुर सिटी एफसीलाई पराजित गर्दै काठमाडौँ रेजर्स नेपाल सुपर लिग (एनएसएल) को प्ले अफमा पुगेको छ । साविक विजेता काठमाडौँलाई प्ले अफमा स्थान बनाउन लिग चरणको अन्तिम खेल कुर्नुपर्ने भएको हो ।

काठमाडौँसँगको हारका बावजुद पनि ललितपुर चौथो स्थानमा रहेर प्ले अफ खेल्ने भएको हो । शनिवार त्रिपुरेश्वरको दशरथ रङ्गशालामा भएको लिग चरणको अन्तिम खेलबाट प्लेअफ पुग्ने अन्तिम टोली बनेको काठमाडौंले ललितपुर सिटी एफसीलाई १–० गोलले हरायो ।

काठमाडौंका लागि पहिलो हाफको इन्ज्युरी समयमा आन्द्रेस नियाले गरेको गोल निर्णायक भयो । काठमाडौंको जितले ८ खेलमा १० अङ्क भएर पनि गोल अन्तरका आधारमा झापा एफसी बाहिरिएको छ ।

यो जितसँगै काठमाण्डौ ८ खेलमा १२ अङ्कसहित तालिकाको तेस्रो स्थानमा उक्लिएको छ । यसअघि नै प्लेअफ पुगिसकेको ललितपुर यो हारले ८ खेलमा १० अङ्कसहित चौथो स्थानमा झरेको छ ।

एनएसएलको क्वालिफायरमा सोमवार पोखरा र धनगढीबीच खेल हुनेछ । यो खेल जित्ने टोली फाइनलमा पुग्नेछ ।