काठमाडौं । युक्रेनी सेनाको नियन्त्रणमा रहेका रुसी सेनामा कार्यरत नेपाली युवाको संख्या चार पुगेको छ ।

हालै रुसी सेनामा कार्यरत मोरङ लेटाङका विकास राईलाई पनि युक्रेनी सेनाले नियन्त्रणमा लिएपछि नेपाली युवाको संख्या चार पुगेको हो । युक्रेनले उनीहरूलाई युद्धबन्दीको रूपमा राखेको छ ।

यसअघि रुसी सेनामा भर्ती भएका बर्दियाका विवेक खत्री, काभ्रेका सिद्धार्थ ढकाल र दाङका प्रतिक पुनलाई युक्रेनले नियन्त्रणमा लिएको थियो ।

रुसले उनीहरू सबैलाई युक्रेनसँगको युद्धमा लड्न पठाएको थियो । युक्रेनले नियन्त्रणमा लिएका चार नेपाली युवालाई नेपाल फर्काउने नयाँदिल्ली र जर्मनीको बर्लिनस्थित नेपाली दूतावासले पहल गरिरहेको बताइएको छ ।