नेपालगन्ज । बाँके प्रहरीले अवैध रुपमा भारत लैजादै गरेको सुनसहित एक भारतीय पक्राउ गरेको छ ।

जिल्ला प्रहरी कार्यालय बाँकेबाट खटिएको टोलीले सुनका गरगहनासहित भारत बाबागन्जका बबलु भन्ने सञ्जयमार सोनीलाई पक्राउ गरेको हो ।

सोनीलाई गणेशमान चारबाट जमुनाहतर्फ जाँदै गर्दा बाटोमा नै प्रहरी टोलीले अवैध सुनका गरगहनासहित पक्राउ गरेको थियो ।

सोनी सवार मोटरसाइकल शंका लागेर जाँच गर्दा सुनका तयारी गरगहना फेला परेको थियो । जिल्ला प्रहरी कार्यालय बाँकेका अनुसार नथिया ठूलो-सानो १० थान ,लकेट १ थान कानमा लगाउने झाला ४ थान र औंठी १ थान बरामद गरिएको छ ।

बरामद भएको सुनका गरगहनाको बजार मूल्य ६ लाख ७८ हजार १ सय ५८ रूपैयाँ रहेको बताइएको छ ।

बरामद भएका सुनका गरगहनासहित सोनीलाई आवश्यक कारबाहीका लागि नेपालगन्ज भन्सार कार्यालयमा बुझाइएको बाँके प्रहरीले जनाएको छ ।