काठमाडौँ । विद्यार्थी भिसामा रुस पुगेका दाङ तुलसीपुर उपमहानगरपालिका-१९ बिजौरीका प्रतीक पुनलाई रुसी सेना बनेर मनग्य आर्थिक लाभ लिने मोह जाग्यो ।

दुई महिना मस्कोमा बिताएका प्रतीकलाई मनग्य कमाइ हुने लोभसँगै रुसको नागरिक बन्ने मोहले रुसी सेना बन्ने बाटोमा पुग्यो । अन्ततः युक्रेन-रुसबिचको युद्धमा सहभागी उनी युक्रेनी सेनाको कब्जामा परेका छन् ।

युक्रेनी सेनाको कब्जामा रहेकै बेला प्रतीकले बोलेको एउटा भिडियो सार्वजनिक भएको छ । उनले भिडियोमार्फत आफू रुसी सेनामा भर्ती भएको र अहिले युक्रेनले आफूलाई कब्जामा लिएको बताएका छन् । ‘मेरो नाम प्रतीक पुन हो । मेरो घर नेपाल दाङ बिजौरीमा हो,’ भिडियोमा उनले भनेका छन्, ‘म रुसी सेनामा भर्ना भएको थिएँ । अहिले युक्रेनको कब्जामा छु ।’

प्रतीक केही समयअघि स्टुडेन्ट भिसामार्फत रुस पुगेका थिए । उनी रुसको राजधानी मस्कोमा दुई तीन महिना बसे । त्यसैक्रममा उनले एक एजेन्टमार्फत रुसी सेनामा हुने गरेको भर्तीबारे सुने । भर्नाका लागि समस्या नहुने र मनग्य कमाइ हुने लोभ देखाएका ती एजेन्टमार्फत उनी रुसी सेनामा भर्ती भए ।

रुसी सेना बनेर मनग्य कमाइ गर्ने लालसामा परेका प्रतीक अन्ततः युक्रेनको नियन्त्रणमा पुगेका हुन् । एक सातायता प्रतीक घरपरिवारको सम्पर्कमा थिएनन् । नागरिक दैनिकबाट