काठमाडौं । प्रधानमन्त्री पुष्पकमल दाहाल ‘प्रचण्ड’ले टिकटकमाथि लगाइएको प्रतिबन्ध हट्ने संकेत गरेका छन् ।

टिकटकका उच्च अधिकारीसँग अनौपचारिक कुराकानीका क्रममा प्रधानमन्त्री दाहालले प्रतिवन्ध हट्नसक्ने संकेत गरेको उनका सूचना प्रविधि विज्ञ प्रकाश रायमाझीले जनाएका छन् ।

रायमाझिले भने–‘टिकटकका उच्च अधिकारीसँग प्रधानमन्त्रीको अनौपचारिक कुराकानी भएको छ । टिकटक नियमनमा आउन तयार भएकाले यसमाथिको प्रतिबन्ध खुल्न सक्ने देखिन्छ ।’

यद्यपी प्रधानमन्त्री दाहालले टिकटकमा नेपाली भाषा बुझ्ने संयन्त्र पनि बनाउन आग्रह गरेको रायमाझीले बताए ।

उनले भने–‘टिकटकका दक्षिण एसिया प्रमुख फेर्दोस मोत्ताकिनसँगको अनौपचारिक कुराकानीमा उहाँले नेपाल सरकारसँग सहकार्य गर्न तयार भएको र टिकटकमा नेपाली भाषा बुझ्ने संयन्त्र पनि बनाउने बताउनुभएको छ । यस्तो हो भने त प्रविधिमाथि नियन्त्रण गर्न हामी पनि चाहँदैनौं ।’