विराटनगर । नेकपा एमाले भ्रातृ संगठन अनेरास्ववियुका सह-संयोजकमाथि खकुरी प्रहार भएको छ ।

अनेरास्ववियु ताप्लेजुङका सहसंयोजक विवेक बानियाँमाथि खकुरी प्रहार भएको हो ।

कोशी प्रदेशसभा सदस्य तीलकुमार मेन्याङ्वोका स्वकीय सचिवसमेत रहेका उनलाई स्थानीय ठेकेदार प्रेम मावोले खुकुरी प्रहार गरेका हुन् ।

ठेकेदार मावोले लेनदेनको विषयमा फुङ्लिंग नगरपालिकास्थित पाथिभरा होटलमा खुकुरी प्रहार गरेका थिए ।

मावोले दिनुपर्ने ९ लाख २० हजार रूपैयाँ बानियाँले ताकेता गरिरहेकोमा मावोले दिएको चेक नसाटिएपछि उनले केही दिनअघि चेक बाउन्सको मुद्दा दायर गरेको प्रहरी अनुसन्धानबाट खुलेको छ ।

मुद्दा दायर गरेपछि हिजो सो विषयमा दुई पक्षबीच छलफल भएको थियो । आज भने ठेकेदार मावोले होटल अगाडि खेदाईखेदाई खुकुरी प्रहार गरेका हुन् ।