रामेछाप । रामेछापको उमाकुण्ड कुवुकास्थलीमा भाइले प्रहार गरेको धारिलो हतियारबाट दाइ घाईते भएका छन् ।

घरायसी विवाद हुँदा उमाकुण्ड गाउँपालिका– ३ कुवुकास्थलीस्थित कोलाका ओसिराम बस्नेतले आफ्नै दाजु ४९ वर्षीय देवबहादुर बस्नेतमाथि धारिलो हतियार प्रहार गरेका थिए ।

भाइको हतियार प्रहारबाट दाजु देवबहादुरको दुवै खुट्टा र दाहिने हातमा गहिरो चोट लागेको छ । उनलाई स्थानीयहरूले घटनास्थलबाट तत्काल उद्धार गरी स्वास्थ्य चौकी लगेका थिए ।

स्थानीय स्वास्थ्य चौकीमा उपचार सम्भव नभएपछि हेलिकोप्टरमार्फत थप उपचारका लागि काठमाडौंस्थित ग्रान्डी अस्पतालमा उपचार भईरहेको छ ।

उक्त घटनापछि हतियार प्रहार गर्ने ओसिरामलाई प्रहरीले नियन्त्रणमा लिएको छ । घटनाबारे थप अनुसन्धान अघि बढाइएको प्रहरीले जनाएको छ ।