काठमाडौं । महिला टी-२० सिरिजअन्तर्गत हङकङविरूद्ध नेपालले खराब सुरूवात गरेको छ।

हङकङ क्रिकेट क्लवको मैदानमा टस जितेर कप्तान इन्दु बर्माले पहिले ब्याटिङ गर्ने निर्णय गरेकी थिइन्।

नेपालले तेस्रो ओभरसम्म ४ विकेट गुमाएको हो । दोस्रो ओभरको चौथो बलमा ओपनर पुजा महतो ४ रन बनाएर आउट भइन्। पुजाको विकेटपछि आएकी सम्झना खड्का तेस्रो ओभरको तेस्रो बलमा आउट भइन्।

लगत्तै काजल श्रेष्ठ चौथो बलमा र कप्तान इन्दु बर्मा पाचौं बलमा आउट भइन्। तीनैजनालाई हङकङकी इक्रा सहरले आउट गरेकी हुन्। कप्तान इन्दु बर्माको विकेटपछि बिन्दु रावल र सीता रानामगर ब्याटिङमा छन्।

नेपालले ४ ओभरमा १४ रन बनाएर खेलिरहेको छ। बुधबार तान्जानिया विरूद्धको खेलमा सीताले ४३ रन बनाएकी थिइन्। हङकङ, तान्जानिया, जापान र नेपाल सम्मिलित महिला टी-२० सिरिजमा बुधबार तान्जानियासँगको पहिलो खेलमा नेपाल २७ रनले पराजित भएको थियो।

सिरिजको शीर्ष दुईमा अटाउन नेपालले आजको खेल जित्नुपर्ने दवाब छ। नेपालले लिगको अन्तिम खेल जापानसँग मंसिर २ गेत खेल्नेछ। शीर्ष २ मा रहनेले उपाधिका लागि खेल्नेछ भने बाँकी २ टिमले तेस्रो स्थानका लागि प्रतिस्पर्धा गर्नेछ।