काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले सरकारले टिकटकमाथि लगाएको प्रतिबन्ध निरंकुशताको बाटो भएको बताएका छन् ।

अध्यक्ष लिङ्देनले सामाजिक सञ्जाल फेसबुकमा आफ्नो धारणा राख्दै प्रजातन्त्र, मानवाधिकार र अभिव्यक्ति स्वतन्त्रताको ठूलठूला घ्वाँस दिनेहरुबाट टिकटकमाथिको प्रतिबन्ध हुनु अनुचित भएको टिप्पणी गरेका हुन् ।

सोमबार बसेको मन्त्रिपरिषदको बैठकले टिकटकलाई बन्द गर्ने निर्णय गरेको थियो। उक्त निर्णयमाथि टिप्पणी गर्दै लिङ्देनले यो अनुचित र अनुपयुक्त भएको बताए ।

उनले लेखेका छन्,‘प्रजातन्त्र, मानवाधिकार र अभिव्यक्ति स्वतन्त्रताको ठूलठूला घ्वाँस दिनेहरूबाट टिकटक माथिको प्रतिबन्ध अनुचित र अनुपयुक्त छ। यो निर्णय निरंकुशताको बाटो हो ।कुनैपनि प्रकारका सामाजिक सञ्जालबाट हुनसक्ने विकृतिको नियमन र नियन्त्रण आवश्यक छ। तर त्यही नाममा प्रतिबन्ध स्वीकार गरिन्न।’

उनले अविलम्ब यो निर्णय फिर्ता लिनुपर्ने पनि बताए। यस्तै टिकटकमाथि प्रतिबन्ध लगाएसँगै अन्य सामाजिक सञ्जालमाथि पनि प्रतिबन्ध लगाउन सक्ने उनले बताए।