काठमाडौं । काठमाडौं उपत्यका अपराध अनुसन्धान कार्यालयले पोल्याण्ड पठाईदिन्छु भन्दै ठगी गर्ने एक जनालाई पक्राउ गरेको छ ।

पक्राउ पर्नेमा भक्तपुर नगरपालिका-१० भइ हाल काठमाडौंको नागार्जुन नगरपालिका–६ रामकोट बस्ने ३९ वर्षीय सुनिता कर्माचार्य रहेकी छन् ।

कर्माचार्यले मदनराज मोक्तनसहित १७ जनालाई पोल्याण्ड जान प्रतिव्यक्ति आठ लाख रुपियाँ लाग्ने भन्दै ३८ लाख रुपियाँ ठगी गरेको प्रहरी अनुसन्धानबाट खुलेको छ ।

कर्माचार्यले पोल्याण्ड पुगेपछि प्रतिष्ठित कम्पनीमा मासिक एक लाख ५० रुपियाँ तलव हुन्छ भनी प्रलोभनमा पारेकी थिइन ।

उनले पटक–पटक गरी सो रकम पीडितबाट उठाइ सम्पर्कविहिन रहेको अवस्थामा वैदेशिक रोजगार विभागले पक्राउ गरी उपस्थित गराउन प्रहरीलाई पत्राचार गरेको थियो ।

प्रहरीले उनलाई काठमाडौंको इन्द्रचोकबाट मंगलबार दिउँसो १ बजे पक्रउ गरी थप अनुसन्धान तथा कारवाहीका लागि वैदेशिक रोजगार विभाग पठाएको छ ।