काठमाडौं । एनआरएनएका अध्यक्ष बद्री केसी र नेकपा एमालेका नेता महेश बस्नेतविरुद्ध प्रहरीमा उजुरी परेको छ । आफूमाथि कुटपिट भएपछि ओम शर्माले काठमाडौंको दरबारमार्गस्थित प्रहरी वृत्तमा उजुरी दिएका हुन् ।

एनआरएनएको कार्यालयमा युवा संघको कार्यक्रम किन गरेको भनी प्रश्न उठाउँदा आफूमाथि कुटपिट भएको शर्माको आरोप छ । एनआरएनए समानान्तर कमिटीका अध्यक्ष आरके शर्मामाथि युवा संघका कार्यकर्ताले मंगलबार दुर्व्यवहार गरेका थिए भने शर्मामाथि कुटपिट गरेको उनीहरुको दाबी छ ।

एमाले नेता बस्नेत समेतको सहभागितामा कार्यालयको हलमा कार्यक्रम भइरहेका बेला अध्यक्षमा पराजित भएपछि समानान्तर कमिटि गठन गरेका आरके शर्मासहितको टीम पुगेपछि विवाद र हातपात भएको बताइएको छ ।

घटनामा बेल्जियम निवासी अभियन्ता तथा पत्रकार शर्माको दाँतमा चोट लागेको बताइएको छ । अध्यक्ष बद्री केसीसहित एनआरएन नवनिर्वाचित टिमको स्वागत कार्यक्रममा एमाले नेता बस्नेत सहभागी थिए ।