काठमाडौं । अख्तियार दुरुपयोग अनुसन्धान आयोगको ‘कर्मचारी हुँ’ भन्दै ठगी गर्ने एकजना पक्राउ परेका छन् ।

बाँके जिल्लाका विभिन्न सरकारी कार्यालय तथा संघ संस्थाहरुमा गई आफूलाई अख्तियारको कर्मचारी बताउँदै ठगी गरेको सूचनाका आधारमा ३७ वर्षीय मोहन कोइरालालाई प्रहरीले पक्राउ गरेको हो ।

चितवनको भरतपुर महानगरपालिका-१२ घर भई हाल नेपालगञ्ज उपमहानगरपालिका-२० राँझामा डेरा लिई बस्ने कोइरालालाई अख्तियार कार्यालय बुटवल, सम्पर्क कार्यालय नेपालगञ्ज तथा जिल्ला प्रहरी कार्यालय बाँकेको टोलीले उनलाई निगरानीमा राखेको थियो ।

सोधपुछका क्रममा उनले उल्टै प्रहरीलाई गाली गलोज गरेको समेत बताइएको छ । कोइरालाले कसैलाई भ्रममा पारी ठग्न खोजेमा प्रहरीमा खबर गर्न समेत जिल्ला प्रहरी कार्यालय बाँकेले अनुरोध गरेको छ।