काठमाडौं । त्रिदेशीय टी-२० अन्तर्राष्ट्रिय क्रिकेट शृङ्खलाको फाइनलमा आज नेपालले यूएईसँग टस हारेको छ।

युएईले फिल्डिङ रोजेर नेपाललाई ब्याटिङको निम्तो दिएको हो। खेल त्रिवि क्रिकेट मैदान कीर्तिपुरमा बिहान ११ बजे सुरु हुने छ।

जारी प्रतियोगितामा नेपाल अपराजित हुँदै फाइनल पुगेको हो भने युएईले हङकङलाई रन रेटको आधारमा पछि पार्दै फाइनलमा नेपालसँगको भेट पक्का गरेको हो।

सिरिजको चार वटै खेलमा जित हात पारेको नेपालले दुई खेलमा युएई र दुई खेलमा हङकङलाई हराएको थियो। फाइनलमा प्रतिद्वन्द्वीको रूपमा रहेको युएईले सिरिजमा नेपालसँगको दुबै खेलमा हार व्यहोरेको थियो।

गत सोमबार मुलपानी क्रिकेट मैदानमा भएको खेलमा नेपालले युएईलाई ५ विकेटले हराएको थियो।

यस्तै कात्तिक १ गते भएको पहिलो खेलमा पनि नेपालले युएईमाथि ७ विकेटको शानदार जित हात पारेको थियो।