काठमाडौं । राष्ट्रिय प्रजातन्त्र पार्टी (राप्रपा) का कोशी प्रदेश संसदीय दल नेता भक्ति सिटौलाले माओवादी केन्द्रलाई लक्षित गर्दै कोशी नामकरणको विषयलाई लिएर अहिले भाँड्दै हिँडेको टिप्पणी गरेका छन् ।

मुख्यमन्त्री केदार कार्कीको विश्वासको मतसम्बन्धी प्रस्तावमा धारणा राख्दै उनले संविधानको परिधिभित्र रहेर प्रदेशको नामाङ्कन गरेको बताए ।

उनले भने–‘अहिले जसले जसरी भनेपछि हुन्छ । तर, नामकरणमा ल्याप्चे लगाउने पार्टीका मान्छेहरूले अहिले फेरि भाँडेर हिँड्ने, त्यस्तो आत्मबल गिरेको मान्छे कुन नैतिकताको साथ राजनीतिमा बस्न सक्छन् । आज हाम्रो अगाडि प्रश्न उठेको छ । ताक परे तिवारी नत्र गोतामे ? यही ढंगको केटाकेटीपनले राजनीति हुन्छ ? हामीले हिँडेको बाटोले ४ सय वर्ष पछाडिको मान्छेलाई बाटो देखाउन सक्नुपर्छ । आज यो किसिमको बच्चापना कुनै पार्टीले गर्न हुँदैन ।’

उनले संविधानसम्मत राखेको नामलाई आवश्यक छ भने संविधानसम्मत नै परिवर्तन गर्नुपर्ने बताउँदै गुण्डागर्दीको शैलीमा ल्याप्चे लगाउने मान्छे नै निस्किन्छन् भने त्यो संविधानसम्मत नहुने बताए ।