काठमाडौं । काठमाडौं उपत्यका अपराध अनुसन्धान कार्यालयले अमेरिका पठाइदिन्छु ठगी गर्ने एक जनालाई पक्राउ गरेको छ ।

पक्राउ पर्नेमा दैलेख घर भई हाल काठमाडौं नागार्जुन नगरपालिका-२ बस्ने ४० वर्षीय कुलबहादुर पन्त रहेका छन् ।

भुवनेश्वर अनात्यले वैदेशिक रोजगारीका लागि अमेरिका पठाइदिन्छु भन्दै ठगी गरेको आरोपमा वैदेशिक रोजगार विभागमा उजुरी दिएका थिए।

सोही उजुरीको आधारमा उनलाई पक्राउ गरिएको उपत्यका अपराध अनुसन्धान कार्यालयले जनाएको छ ।

उनले पीडितलाई अमेरिका पठाइदिन्छु, त्यसका लागि १३ लाख रुपैयाँ लाग्छ भनी प्रलोभनमा पारी ११ लाख ५० हजार रुपैयाँ रकम लिई फरार भएकाले पक्राउ गरिएको प्रहरीले जनाएको छ ।

थप अनुसन्धान तथा कारबाहीको लागि उनलाई वैदेशिक रोजगार विभाग ताहाचल पठाइएको प्रहरीले जनाएको छ।