काठमाडौं । अभिनेता अनमोल केसी पक्राउ परेका छन् ।

केसीलाई काठमाडौं उपत्यका अपराध अनुसन्धान कार्यालयको टोलीले आपराधिक विश्वासघात गरेको आरोपमा भक्तपुरको साँगाबाट पक्राउ गरेको हो ।

चलचित्र ‘रावायण’का निर्माता समूहले दिएको जाहेरीका आधारमा उनी पक्राउ परेका हुन्।

फिल्म खेल्न उनले १० लाख रुपैयाँ लिएको र पछि अस्वीकार गर्दा एक करोड भन्दा धेरै नोक्सान भएको उजुरी छ।

निर्माण कम्पनी सुदर्शन थापा प्रोडक्सन प्रालिको तर्फबाट सुप्रिया भन्ने चन्द्रकला कटुवालले उजुरी दिएकी थिइन् ।

केसीले सुदर्शन थापाको निर्देशनमा बन्न लागेको यस फिल्ममा सम्झौता गरेका थिए । तर ‘रावायण’लाई छाडेर ‘फर्की फर्की’मा केसीले काम गर्ने पक्का भएपछि आफूलाई धोका दिइएको भन्दै निर्माता कटुवालले उजुरी दिएकी थिइन् ।