काठमाडौं । गृहमन्त्री नारायणकाजी श्रेष्ठले चिकित्सकमाथि आक्रमण गर्नेलाई मुद्दा चलाउन प्रहरी प्रशासनलाई निर्देशन दिएका छन् ।

पोखराको मणिपाल शिक्षण अस्पताल र लमजुङको लमजुङ अस्पताल लगायत शिक्षणसंस्थामा चिकित्सकमाथि आक्रमण र तोडफोड गर्नेलाई मुद्दा चलाउन निर्देशन दिइएको हो ।

चिकित्सकहरू आन्दोलित भएपछि गृहमन्त्री नारायणकाजी श्रेष्ठले मंगलबार स्वास्थ्यमन्त्री मोहनबहादुर बस्नेतसहित सरोकारवालाहरुको बैठक बोलाएका थिए । बैठकले स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन–२०६६ बमोजिम कारबाही अघि बढाउन निर्देशन दिएको बताइएको छ ।

चिकित्सकमाथि आक्रमण र तोडफोडमा संलग्नहरूमाथि उक्त ऐनको व्यवस्थाअनुसार मुद्दा चलाएर कारबाही गर्न निर्देशन दिने निर्णय गरिएको हो ।

कुटपिटको आरोपमा बेंसीसहर नगरपालिका–७ का वडा अध्यक्ष ऋषिराम बस्नेत र पोखरा–५ का विनय गुरुङलाई प्रहरीले प्रक्राउ गरिसकेको छ ।