अछाम । ईलाका प्रहरी कार्यालय कमलबजार अछामको निर्माणाधीन भवनको शिलान्यास गरिएको छ ।

सुदूरपश्चिम प्रदेश प्रहरी कार्यालयका प्रहरी प्रमुख तथा प्रहरी नायव महानिरीक्षक भरतबहादुर बोहराले सोमबार भवनको शिलान्यास गरेका हुन् ।

सो भवन शिलान्यासका क्रममा डीआईजी बोहराले इलाका प्रहरी कार्यालयमा कार्यरत प्रहरी कर्मचारीहरुलाई इमानदारी साथ जनताको सेवा गरी प्रहरी संगठनको गरिमा बुलन्द गर्न निर्देशन पनि दिए । यस्तै डीआईजी बोहराले स्थानीय जनप्रतिनिधिहरुसँग पनि अन्तरक्रिया गरेका थिए ।

भवन शिलान्यास कार्यक्रममा अछामका प्रहरी प्रमुख तथा प्रहरी नायब उपरीक्षक सन्तोष पाठक, प्रहरी नायब उपरीक्षक सागर बोहरा, प्रहरी कर्मचारी, स्थानीय जनप्रतिनिधिलगायतको उपस्थित रहेको थियो ।

हाल ईलाका प्रहरी कार्यालय कमलबजार कमाण्ड प्रहरी निरीक्षक वीरेन्द्र जोहारी सम्हाल्दै आएका छन् । उनले यसअघि जिल्ला ट्राफिक प्रहरी कार्यालय कैलालीमा हुँदा पनि उत्कृष्ट काम गरेका थिए । अहिले पनि उनले विभिन्न सचेतनामूलक कार्यक्रम सञ्चालन गर्दै आएका छन् ।

यस्तै सोमबार नै डीआईजी बोहराले अछामको प्रहरी चौकी सिउँडी, प्रहरी चौकी जयगढको नवनिर्मित भवन उद्घाटन गरेका थिए ।