काठमाडौं । चीनमा जारी १९औँ एसियाली खेलकुद प्रतियोगितामा महिला क्रिकेटको उपाधि भारतले जितेको छ ।

भारतले फाइनल खेलमा श्रीलंकालाई १९ रनले हराउँदै उपाधिमाथि कब्जा जमाएको हो । टस जिती पहिलो ब्याटिङ रोजेको भारतले निर्धारित २० ओभरमा सात विकेट गुमाएर एक सय १६ रन बनाएको थियो ।

जवाफी ब्याटिङमा ओर्लिएको श्रीलंकाले भने निर्धारित ओभरमा आठ विकेट गुमाएर ९७ रनमात्र बनाउन सक्यो । श्रीलंकाका लागि हसिनी परेराले सर्वाधिक २५ रन बनाइन् । निलाक्षी डा सिल्भाले २३ रन जोडिन् ।

श्रीलंकाका लागि ओसादी रनसिङ्घेले १९ र कप्तान चामरी आथापाथुले १२ रन बनाएका थिए । यसअघि एसियाली खेलकुदको महिला क्रिकेटमा बंगलादेश तेस्रो भएको थियो । तेस्रो स्थानका लागि सोमबार नै खेलिएको खेलमा बंगलादेशले पाकिस्तानलाई पाँच विकेटले पराजित गरेको थियो ।