एजेन्सी । क्यानडाले भारतका एक जना कूटनीतिज्ञलाई देश निकाला गरेको छ ।

क्यानडाको ब्रिटिश कोलम्बियामा शिख समुदायका नेता हरदीप सिंह निज्जरको हत्या गरेको भन्दै भारतका कूटनीतिज्ञलाई देश निकाला गरेको हो ।

यसअघि क्यानडाका प्रधानमन्त्री जस्टिन ट्रुडोले संसदमा सम्बोधन गर्ने क्रममा भारत सरकारको एजेन्टले निज्जरको हत्या गरेको बताएका थिए ।

उनले भारतमा सेप्टेम्बर ९/१० मा आयोजित जी–२० बैठकको बेला आफूले यो मुद्दालाई प्रधानमन्त्री नरेन्द्र मोदीसमक्ष उठाएको जानकारी पनि दिएका थिए ।

क्यानडाका विदेशमन्त्री मेलनी जोलीले भारतका बरिष्ठ कूटनीतिज्ञलाई देश निकाला गरिएको जानकारी दिएकी हुन् ।

देश निकाला गरिएका भारतीय कूटनीतिज्ञ क्यानडामा भारतको इन्टेलिजेन्स प्रमुख रहेको बताइएको छ ।

भारतीय विदेश मन्त्रालयले भने क्यानडामा कुनै पनि प्रकारको हिंसामा भारत सरकार संलग्न भएको आरोपको खण्डन गरेको छ ।