काठमाडौं । ६० किलो सुन तस्करी प्रकरणमा २९ जनालाई प्रतिवादी बनाएर काठमाडौं जिल्ला अदालतमा मुद्दा दायर भएको छ ।

सरकारी वकिल कार्यालय काठमाडौंले काठमाडौं जिल्ला अदालतमा मुद्दा दर्ता गरेको हो । प्रहरीको केन्द्रीय अनुसन्धान ब्यूरो सीआईबीले ५० जनालाई प्रतिवादी बनाउनुपर्ने राय पेश गरेको थियो ।

जसमा पक्राउ परेका ३२ र फरार १८ जना थिए । विमानस्थल भन्सार कार्यालय बाहिरबाट साउन २ गते ब्रेक सूमा ल्याइएको सुन ६० किलो ७१६ ग्राम सुन समातिएको थियो ।

राजस्व अनुसन्धान विभागले समातेको सुन सम्बन्धमा पछि सीआईबीले अनुसन्धान गरेको थियो । त्रिभुवन विमानस्थल भन्सार कार्यालयका ८ जना कर्मचारीहरू, चार जना भन्सार एजेन्ट, तीन कार्गो एजेन्ट, एक ट्याक्सी चालक, एक भाषा अनुवादक, दुई कम्पनी खोल्ने, दुई कम्पनी खडा गर्ने र सुनको कारोबारमा प्रत्यक्ष रूपमा संलग्न ११ जना गरी ३२ जना प्रहरी हिरासतमा छन्।

सरकारी वकिल कार्यालयले पनि कुल ३६२.७७८ किलोग्राम सुनको बिगो मागदाबी गरेको छ। ३ अर्ब ५० करोड २ लाख १६ हजार ५५२ रुपैयाँ बिगो मागदाबी गरेको हो। ३५ दिन अनुसन्धान गरेपछि सीआइबीले गत बुधबार सरकारी वकिल कार्यालयमा पेश गरेको थियो।